Sebahul xeyr xana min şehî şîrîn zebana min 
 Tuyî ruh û rewana min bibit qurban te canê min 
  
 Te alellah çizatî tu çi wî şîrîn sifatî tu 
 Ne wek qend û nebatî tu yeqîn ruh û heyatî tu 
  
 Heyat û reheta can im sebahul xeyr ya xanim   
 Were bînahiya çavan bibînîm bejn û balayê 
  
 Sebahul xeyrî mesta min letîfa cam bi desta min 
 Xumar û meyperesta min tuyî meqsûd û qesta min 
  
 Ji meqsûdan tuyî bes min bibin ber çerxê etles min 
 ji xeyrê te nevêt kes min bi reş toz in muqewwes min  
  
 Di benda zulfê çewkan im  sabahul xeyrî ya xanim   
 Were bî nahiya çavan bibînim bejn û balayê 
  
 ji wê zulfê ji wê bendê reha bim lê ji peywêndê 
 Siyeh çeşmê sipî zendê te sohtim şibhetê findê 
  
 Şubhê şem û şemal im ez ji ber hubba te lal im ez 
 Daif im wek hilal im ez sîfet goyîn di kal im ez 
  
 Ve bulbul ra bi evxan im  sebahul xeyrî ya xanim   
 Were bînahiya çavan biînim bejn û balayê 
  
 Ve bulbul ra şev û rojê ser wê terh û bişkojê 
 Enî mahî şefeq rojê te sohtim şubhetê dojê 
  
 Ku dûr im ez ji wê hûrê tenê carek li ser sûrê 
 Ji wadî eymana torê tecella kir di nîv nûrê 
  
 Ji wê sohtî dil û can im  sabahul xeyr ya xanim   
 Were bînahiya çavan bibînim bejn û balayê 
  
 Ji husna wê tecellayê yedî beyda û belayê 
 Çi wesfan bîm xeber nayê welê dil cezbê dayê 
  
 Ne hişyar im ji wê berqê ji zer tacêli ser ferqê 
 Ji spêde da heta şerqê belê naêxmê ferqê 
  
 Ji derba işqê nalan im  sabahul xeyr ya xanim   
 Were bînahiya çavan bibînim bejn û balayê 
  
 Zarîfê nazikê şengê sîfet hûrî perî rengê 
 Bi rojê ra tu hevdengî du reş toz in siyeh yengê 
  
 Kişandin lê ne wek caran xedengên qews û nûbaran 
 Ji rengê şîr û mukaran reşandin sîne wek baran 
  
 Jiwê derbê pir êşan im  sabahul xeyrî ya xanim   
 Were bînahiya çavan bibînim bejn û balayê 
  
 Veke carek xet û xalan li ser wan mesned û palan 
 Bixwîne li me ebdalan bibînin îd û sersalan 
  
 Îcazet dê me destûrê perî rengê sîfet hûrê 
 Ji nîva zulmet û nûrê binoşin mey di ferfûrê 
  
 Ji dil talanê xalan im  sabahul xeyrî ya xanim   
 Were bînahiya çavan bibînim bejn û balayê 
  
 Ji şehkasa ku qerqef tê meya nûrên muşerref tê  
 Nîşanek dîlberê kef tê ji bo min her seher xeftê 
  
 Ji wê camê dinoşim ez seher lew ney li hoş im ez 
 Ji amê lê dipoşim ez bi can her lê dikoşim ez 
  
 Ku xalib mest û şukran im  sabahul xeyrî ya xanim   
 Were bînahiya çavan bibînim bejn û balayê 
  
 Were pêşber melayê xwe şehîd û mubtelayê xwe 
 Bi şefqet ke liqayê xwe meya nemrit bi dayê xwe 
  
 Mesîhayê li bîmaran kesên gestî du reş maran 
 Şehîdên şir û mukaran kirî amancê nûbaran 
  
 Li dîdara te heyran im  sebahul xeyrî ya xanim   
 Were bînahiya çavan bibînim bejn û balayê