Şoxeka gewr û bilind e 
 Dost û yara min ew e 
 Sorgula pir naz û rind e 
 Sozdara min ew e 
  
 Gulşena baxê evînê  
 Şahiya roja civînê 
 Rindiya Şêrîn  û Zînê 
 Payedara min ew e 
  
 Padişaha ebrûmaha 
 Zêrkulaha kesk û sor 
 Por û biskê rengê miskê 
 Nûbihara min ew e 
  
 Ger bidî ferman bi kuştin 
 Şehreyara min ew e 
 Ser bidim ber şûr û xencer 
 Yadîgara min ew e 
  
 Çarde salan ez bi rojî 
 Nû şikandin ebriwan 
 Mey ji lêvên rerxewanî 
 Tim fitara min ew e 
  
 Hêj di ber qalû-belayê  
 Meyperest im ta ebed  
 Lê ji gulzara evînê 
 Gulîzara min ew e 
  
 Dilgir im bêçare me 
 Can û ceger min bûne xwîn 
 Ah ji destê şox û şengê 
 Derd û çara min ew e 
  
 Lyrics: Cegerxwîn 
 Music: Yunus Dişkaya